मी

मी मानरहीत, अपमानरहीत
मी तेजहीन, मी तमोहीन

मी युध्दामध्ये अकलंकित
ना प्रेमामध्ये पुलकित पुलकित ।।

मी सूर्यामध्ये अनल अनल
मी सर्पामध्ये गरल गरल ।
लंकेमध्ये लंकेशरहीत नी,
अयोध्येत मी रामरहीत ।

मी शब्दरहीत, मी रंगरहीत
निःशब्दरहीत, निरंगरहीत

मी सैरभैर, मी स्थिर अचल
मी धराधरंद्रे मी गगनविभोर

मी सत्वहीन, निसत्वहीन
जाज्वल्यरहीत, शैथिल्यरहीत

मी शूलटक, मी पाशदंड
मी निदलपुंज, मी बंधरहीत ।

मी सघन सघन, मी गृत्समदीत…

मी पापरहीत, मी पुण्यरहीत
देवरहीत, मी दैत्यरहीत

मी श्रध्दहीन, अश्रद्धहीन ।
मी श्वासरचित… निश्वासरचित

मी विज्ञानरचित, मी अभिमंत्रित
इतिहासरहीत, मी भूगोलरहीत ।

मी पाषाणहीन, मी पवनहीन
मी उदकहीन, अवकाशहीन

मी पुरुषहीन, मी प्रकृतीहीन
सगुणरहीत, नी निर्गुणरहीत…

मी पाण्यावरती तरल तरल
मी पाण्याखाली प्रवल प्रवल

मथुरेत मी कंसरहीत
अन्
द्वारकेत भी कृष्णरहीत ।

मी पद्यरहीत, मी गद्यरहीत
मी खंडरहीत, मी सर्गरहीत ।

मी वर्णरहीत, मी चर्महीन
मी रंध्ररहीत, मी रुधिर हीन

मी हास्यहीन, मी अश्रुरहीत
मी स्वेदहीन, मी मद्यरहित

मी ध्यानरहीत, मी कैफरहीत
मी गंधहीन, दुर्गंधहीन ।

मी हीनरहीत मी रहीतहीन
मी रहीतहीन मी हीनरहीत… ।।

(गृत्समद: कापसाचा शोध लावणारा ऋग्वेदी ऋषी )

• सुदेश (काळया ठिपक्यांचं सोनेरी काळवीट)